ڈہرکی (رپورٹ: علی رضا) ڈہرکی میں گزشتہ روز سے لاپتہ ہونے والے معصوم بچے کی لاش نالے سے برآمد ہونے پر گھر میں کہرام مچ گیا، جبکہ اس افسوسناک واقعے کے باعث پورے علاقے میں دکھ اور سوگ کی لہر دوڑ گئی ہے۔
دلخراش واقعے کے بعد ٹاؤن کمیٹی ڈہرکی کی انتظامیہ کی کارکردگی پر سخت سوالات اٹھ کھڑے ہوئے ہیں، کیونکہ شہر کے مختلف علاقوں میں کھلے نالوں اور گٹروں پر ڈھکن نہ ہونے کے باعث شہریوں کی جانوں کو مسلسل خطرات لاحق ہیں۔
شہریوں اور سماجی حلقوں نے اعلیٰ حکام سے پرزور مطالبہ کیا ہے کہ واقعے کی شفاف تحقیقات کرا کے غفلت کے مرتکب ذمہ داران کا تعین کیا جائے اور شہر کے تمام کھلے نالوں اور گٹروں پر فوری طور پر ڈھکن رکھے جائیں تاکہ مستقبل میں ایسے قیمتی جانی نقصانات سے بچا جا سکے۔



