شکارپور (رپورٹر): شکارپور کے علاقے وزیرآباد کے قریب گاؤں عظیم مہر میں اچانک آگ لگنے سے ایک ہی خاندان کے تین گھر مکمل طور پر جل کر راکھ ہو گئے، جس کے نتیجے میں 15 سے 20 لاکھ روپے کا نقصان ہوا ہے۔
تفصیلات کے مطابق آتشزدگی سے محمد پناہ مہر اور ان کے دو بیٹوں نادر علی اور اللہ ڈنو کے گھر خاکستر ہوئے۔ گھروں میں رکھا بیٹی کا جہیز، دو تولہ سونا، نقدی، گھریلو سامان، بستر اور دو گائیں بھی جھلس کر ہلاک ہو گئیں، جس کے بعد متاثرہ خاندان معصوم بچوں سمیت کھلے آسمان تلے بیٹھا ہے۔
متاثرہ محمد پناہ مہر نے بیٹوں کے ہمراہ احتجاج کرتے ہوئے ڈپٹی کمشنر شکارپور، پی پی ایم پی اے حاجی محمد عارف خان مہر اور مخیر حضرات سے اپیل کی ہے کہ انسانی ہمدردی کی بنیاد پر ان کی فوری مالی مدد کر کے راشن اور رہائش فراہم کی جائے۔



