نوشہرو فیروز: (محمد عادل عباسی) بھریاستی کے وارڈ نمبر 5 کلہوڑہ کالونی کے رہائشی 20 سالہ نادر ولد غلام شبیر کلہوڑو کی لاش 21 گھنٹے کی مسلسل تلاش کے بعد روہڑی کینال سے برآمد۔
ورثاء نے الزام عائد کیا ہے کہ پولیس نے مبینہ طور پر نوجوان کو گرفتار کرنے کی کوشش کی جس پر اس نے خوف کے مارے نہر میں چھلانگ لگا دی اور ڈوب گیا۔ ورثاء نے واقعہ کے خلاف شدید احتجاج کرتے ہوئے اعلیٰ حکام سے شفاف تحقیقات اور ذمہ داروں کے خلاف قانونی کارروائی کا مطالبہ کیا ہے۔
دوسری جانب ایس ایچ او بھریا ذوالفقار بھنبھرو نے ورثاء کے الزامات کو مسترد کرتے ہوئے کہا ہے کہ نادر کلہوڑو کے پیچھے کوئی پولیس موجود نہیں تھی۔ ان کے مطابق نوجوان نہانے کے لیے نہر میں گیا تھا جہاں پانی کے تیز بہاؤ کے باعث وہ ڈوب گیا۔
ایس ایچ او کے مطابق واقعے کے روز پولیس اہلکار نادرا کے معائنہ کے سلسلے میں بھریا روڈ پر ڈیوٹی پر تھے۔ پولیس کا کہنا ہے کہ ان پر لگائے گئے الزامات بے بنیاد ہیں جبکہ واقعے کی مزید تفتیش جاری ہے۔
