کورواہ/گولاڑچی (ویب ڈیسک): کورواہ کے قریب گاؤں وریو خاصخیلی میں مبینہ طور پر غیرت کے نام پر خونریز واقعہ پیش آیا، جہاں ملزم حسین خاصخیلی نے کلہاڑی کے وار کرکے اپنی 18 سالہ بھتیجی آمنہ دختر امیر بخش خاصخیلی کو قتل کر دیا، جبکہ تین افراد کو شدید زخمی بھی کر دیا۔
پولیس کے مطابق واقعے میں ملزم کی اہلیہ روزینہ، بھابھی شارو زوجہ امیر بخش اور امیر بخش ولد صادق خاصخیلی زخمی ہوئے، جنہیں تشویشناک حالت میں تعلقہ اسپتال گولاڑچی منتقل کر دیا گیا۔
اطلاع ملنے پر کورواہ پولیس موقع پر پہنچ گئی اور لاش و زخمیوں کو تحویل میں لے کر ضروری کارروائی شروع کی۔ پولیس نے ملزم حسین خاصخیلی کو واردات میں استعمال ہونے والی کلہاڑی سمیت گرفتار کر لیا ہے۔
مقامی ذرائع کے مطابق ڈیڑھ ماہ قبل شادی شدہ خاتون شارو مبینہ طور پر گھر چھوڑ کر ایک شخص سے شادی کر کے چلی گئی تھی، جسے جرگے کے فیصلے کے بعد دو روز قبل واپس گھر لایا گیا تھا۔
بتایا جا رہا ہے کہ ملزم حسین خاصخیلی نے اپنی بھتیجی آمنہ پر شارو کی مدد کرنے کا الزام لگاتے ہوئے اسے قتل کر دیا۔
پولیس کا کہنا ہے کہ واقعے کے مختلف پہلوؤں سے تحقیقات جاری ہیں، جبکہ علاقے میں خوف و ہراس پھیل گیا ہے۔
