بڈانی (ویب ڈیسک) بڈانی کے کچے والے علاقے گبلو تھانے کی حدود میں پرانی دشمنی پر بنگوار برادری کے دو گروپوں میں مسلح تصادم ہو گیا، جس کے نتیجے میں ایک خاتون سمیت 3 افراد موقع پر ہی گولیاں لگنے سے جاں بحق ہو گئے ہیں۔
ذرائع کے مطابق، تصادم کے دوران دونوں اطراف سے ایک دوسرے پر جدید ہتھیاروں سے اندھا دھند فائرنگ کی گئی، جس کی وجہ سے پورا علاقہ جنگ کا میدان بن گیا۔
فائرنگ کے نتیجے میں میہار بنگوار، غلام فرید بنگوار اور ایک خاتون موقع پر ہی دم توڑ گئے۔
واقعے کی اطلاع ملتے ہی پولیس کی بھاری نفری کچے کے علاقے میں پہنچ گئی اور صورتحال کو کنٹرول میں لیتے ہوئے مقتولین کی لاشیں سول ہسپتال منتقل کر دیں۔
پولیس کی جانب سے ہسپتال میں قانونی کارروائی اور پوسٹ مارٹم مکمل کرنے کے بعد لاشیں وارثوں کے حوالے کر دی گئیں۔
لاشیں گھر پہنچنے پر مقتولین کے گھروں میں کہرام مچ گیا اور علاقے میں سوگ کی فضا قائم ہو گئی ہے۔
پولیس حکام کا کہنا ہے کہ واقعہ پرانے تنازع کی وجہ سے پیش آیا ہے، جبکہ علاقہ مکینوں کے مطابق اس وقت بھی دونوں گروپوں میں شدید کشیدگی برقرار ہے اور مزید خونریزی کا خدشہ ہے، جس کی وجہ سے علاقے میں خوف و ہراس کا ماحول پھیلا ہوا ہے۔
