کراچی: (نامہ نگار) سندھ حکومت نے کراچی واٹر اینڈ سیوریج کارپوریشن کے نظرثانی شدہ پانی اور سیوریج کے نرخوں کی منظوری دے دی۔ مالی سال 2026-27 کے لیے نئے نرخوں میں 7.05 فیصد اضافہ کیا گیا ہے اور یہ شرحیں یکم جولائی سے لاگو ہوں گی۔
نظرثانی شدہ نرخوں میں رہائشی پلاٹوں کے پانی اور سیوریج کے ماہانہ چارجز پلاٹ کے رقبے کے مطابق مقرر کیے گئے ہیں جبکہ مختلف کاروباری مراکز اور دکانوں کے ماہانہ نرخ بھی مقرر کیے گئے ہیں۔
واٹر کارپوریشن کے مطابق نرخوں میں اضافے کا مقصد ادارے کی آمدنی میں اضافہ اور شہر میں پانی کی فراہمی، سیوریج کے نظام کی بحالی اور مرمت کے لیے مالی وسائل کو بہتر بنانا ہے۔ قانون کے مطابق واٹر کارپوریشن کو ہر سال 7 فیصد تک نرخ بڑھانے کی اجازت ہے۔
