کراچی (ویب ڈیسک): کمشنر کراچی سید حسن نقوی نے شہر کی انتظامیہ کو پورے کراچی سے تمام غیر قانونی بل بورڈز، بینرز اور ہورڈنگز ہٹانے کا سخت حکم دیا ہے۔
ایک اعلیٰ سطحی اجلاس کی صدارت کرتے ہوئے کمشنر نے کہا کہ سرکاری املاک پر لگے ایسے تمام بورڈز غیر قانونی ہیں اور متعلقہ اداروں کو چاہیے کہ وہ اس سلسلے میں فوری کارروائی کریں۔
اجلاس میں فیصلہ کیا گیا کہ سپریم کورٹ اور ہائی کورٹ کے احکامات پر سختی سے عملدرآمد کو یقینی بنایا جائے گا۔ اگر کسی افسر یا اشتہاری ایجنسی کی جانب سے عدالتوں کے احکامات کی خلاف ورزی کی گئی تو ان کے خلاف قانونی مقدمات درج کیے جائیں گے۔ اس کے علاوہ نجی املاک پر لگے غیر محفوظ اشتہاری بورڈز کو بھی غیر قانونی قرار دے دیا گیا ہے۔
