کراچی (ویب ڈیسک) سندھ کے مختلف شہروں اور دیہاتوں میں مون سون بارشوں کے نئے سسٹم کے تحت آج سے ہلکی اور تیز بارش کا سلسلہ شروع ہوگیا ہے جس کے نتیجے میں شدید گرمی اور نمی میں کمی آ گئی ہے اور موسم خوشگوار ہو گیا ہے۔
محکمہ موسمیات کی رپورٹ کے مطابق آج سب سے زیادہ بارش تھرپارکر، عمرکوٹ، مٹھی، نگرپارکر اور اس کے گرد و نواح کے سرحدی دیہات میں گرج چمک کے ساتھ ریکارڈ کی گئی۔
دوسری جانب حیدرآباد اور میرپورخاص ڈویژن کے بعض علاقوں میں تیز ہواؤں کے ساتھ موسلا دھار بارش ہوئی۔
صوبائی دارالحکومت کراچی کے مختلف علاقوں جیسے گلشن حدید، سپر ہائی وے، ملیر اور ساحلی پٹی میں آج ہلکی سے درمیانی بارش ہوئی۔
شمالی اور مغربی سندھ کے اضلاع دادو، لاڑکانہ، جیکب آباد اور سکھر میں بعض مقامات پر گرد آلود ہواؤں اور تیز ہواؤں کے بعد ہلکی بارش ہوئی ہے۔
محکمہ موسمیات نے پیش گوئی کی ہے کہ بارشوں کا یہ سلسلہ کراچی، حیدرآباد اور نوابشاہ ڈویژن میں آج رات تک وقفے وقفے سے جاری رہ سکتا ہے۔
شہر کی انتظامیہ نے بارش کے پیش نظر ایمرجنسی نافذ کرتے ہوئے شہریوں کو بجلی کے کھمبوں اور تاروں سے دور رہنے کی ہدایت کی ہے۔