شکارپور (ویب ڈیسک) شکارپور کے علاقے گڑھی یاسین میں انڈس ہائی وے پر ٹول پلازہ پر ٹول ٹیکس پر جھگڑے کے دوران بس ڈرائیور نے مبینہ طور پر ٹول پلازہ کے ملازم کو زدوکوب کردیا جس کے نتیجے میں ملازم موقع پر ہی جاں بحق ہوگیا۔
پولیس کے مطابق جاں بحق ملازم کی شناخت علی رضا شر کے نام سے ہوئی ہے۔ ابتدائی معلومات کے مطابق ٹول ٹیکس وصولی کے دوران بس ڈرائیور اور ملازم کے درمیان جھگڑا ہوا جس کے بعد ڈرائیور نے مبینہ طور پر بس کو آگے بڑھا دیا جس سے ملازم ہلاک ہوگیا۔
واقعہ کے بعد بس ڈرائیور گاڑی چھوڑ کر فرار ہو گیا۔ اطلاع ملنے پر پولیس نے موقع پر پہنچ کر لاش کو اسپتال منتقل کردیا، واقعے کے شواہد اکٹھے کرکے تفتیش شروع کردی۔
پولیس مفرور ملزمان کی گرفتاری کے لیے مختلف مقامات پر چھاپے مار رہی ہے۔ مقتول کے لواحقین نے ملزمان کی فوری گرفتاری اور سخت قانونی کارروائی کا مطالبہ کیا ہے۔
